LOGROÑON PINTXOTAN: LAUREL KALEKO IBILBIDEA
Ez dakigu onenak diren, tipikoenak edo ezagunenak… baina hauek dira guri gustatzen zaizkigun pintxoak.
Hau da Errioxako hiriburura joaten garenean «Laurelear» egitera egiten dugun ibilbidea. Logroñora egindako joan-etorrietan geure egin dugun esamoldea da hori.
Abisatuta zaudete… Eta orain, pintxotan etorriko zarete gurekin?
Logroñoko kalerik ezagunena Laurel kalea den arren, pintxotan ibiltzeko giroa beste hiru kale ezagunetan ere zabaltzen da: San Agustín, Albornoz kalea eta Travesía del Laurel.
Asteburuan bazoazte, ez hasi goizegi pintxotan ibiltzen, ordu bata baino lehen taberna askotako sukaldeak itxita aurkituko baitituzue, eta ostalariek «etorri pixka bat geroago» esango dizuete.
Ordu hori iristean, bikoteak, lagun-kuadrillak eta haurrak dituzten familiak kaleetan barrena ibiltzen hasten dira, eta tabernek beren barrak tentazio txikiz betetzen dituzte.
Ibilbide honetan aurkitzen ditugun pintxoak ez dira, gure ustez, Donostiako Easo Ederrekoak edo Erdi Aroko Gasteizkoak bezain landuak.
Hala ere, badute alde on bat: Errioxako bertako produktuetan oinarritzen dira, eta horrek balio berezia ematen die, produktu freskoak eta kalitatezkoak baitira.
Ezagunenetako batzuek izen iradokitzaileak dituzte, hala nola Matrimonio, Zapatillas edo Cojonudos.
Baina horiek dira, hain zuzen ere, saihestuko ditugunak, ezagunenak eta begi-bistakoenak direlako.
Eta orain… «Laurelear» egitera goaz?
LA TABERNA DEL LAUREL
Taberna honetako barran Errioxako produktu gozo ugari aurkitzen ditugu, pintxo bihurtuta.
Gehien gustatzen zaizkigunen artean daude urdaiazpiko egosiz eta gaztaz betetako zainzuriak eta urdaiazpiko onduz, txanpinoiz eta ahuntz-gaztaz betetako zerba-zurtoinak.
Baina kristalezko erakusleihoaren atzean ez duzue bertako espezialitatea aurkituko: patata minak (patatas bravas).
Aurreko pintxoak osatzeko aukera gozoa dira.
Eta haurrekin bazoazte, ez kezkatu: patata minen anoa erdia pikantea eta beste erdia pikante gabe eska daiteke.
Honela zerbitzatuko dizuete, oihuka:
«¡Media de Bravas y media de Raras!»
BAR DONOSTI 
Betiko pintxoak izugarri gustatzen zaizkigu, hala nola ahuntz-gazta, konfitura eta intxaurrekin egindako ogi txigortua. Haragirik eta barazkirik gabeko pintxo aproposa da, eta gure semearen gogokoena.
Beste aukera batzuk dira txerri-azpizun pintxoa, roquefort edo piperbeltz saltsarekin, mamitsua eta oso zaporetsua, edo onddozko ogi txigortua, urdaiazpiko-pastazko oinarri batekin.
Edalontzi berezi batean zerbitzatzen dute, behealdean tenperatura baxuan prestatutako arrautza duela, onddoekin eta onddo-kremazko estalki batekin.
Pintxo hau aurkeztu zuten Errioxako XV. Tapa Lehiaketan.
Gure ustez oso gozoa da eta, gainera, gainerako pintxoetatik desberdina.
LAS CUBANAS TABERNA-JATETXEA
Las Cubanas tabernara beti itzultzen gara.
Ez dugu esango prezio merkeak dituenik, baina bertako pintxoak oso oparoak eta kalitate handikoak dira.
Bere espezialitatea izugarri gustatzen zaigu: txerrikume kurruskaria, labeko pataten gainean zerbitzatua.
Gainetik oso saltsa egokia jartzen diote.
Txerrikume kurruskariaz gain, iberiar txerriaren presarekin egindako risottoa eta foiearekin lagundutako otarrainxka handia ere dastatzera ausartzen gara.
Biak ala biak oso gomendagarriak dira.
BAR LA CASITA
Benetako jaki gozoz osatutako burruntzi bat jateko gogoa duzuenean, La Casita tabernara joateko unea da.
Bertako aulki altuetako batera igo ondoren, olagarro edo ezpata-arrain burruntzi gozoak dastatu ahal izango ditugu, piperrautsaz hautseztatuak.
Edo, besterik gabe, espinaka, mahaspasa eta pinaziekin egindako kroketa gozo bat eskatu…
Mmmm!
BAR EL SORIANO
Soriano tabernan Logroñoko pintxo klasiko bat aurkitzen dugu: «El champi».
Plantxan egindako hiru txanpinoiz osatutako dorre mamitsua da, zapore berezia ematen dion saltsa misteriotsu batez bustia.
Pintxo erraz eta arin bat nahi baduzue (ibilbidea dagoeneko nabaritzen hasi baita), hau da zuen taberna.
PULPERÍA LA UNIVERSIDAD
Beti izaten da itsasoa faltan botatzen duen norbait.
Eta gu bezala kostaldekoak bazarete, Galiziako estiloko olagarro-taberna honetako barrak tentatuko zaituzte.
Bertan, itsasoko produktuak ikusi orduko jateko gogoa pizten da.
Hauxe da gure azken geldialdia, gure gosea asetzeko Galiziako erara prestatutako olagarro-anoa bat eta txipiroi frijituak dastatuz.
CAFÉ MODERNO
Kafearen zale amorratuak ere bazarete, ibilbidea Café Modernon amaituko duzue.
Martínez Zaporta plaza txiki eta atseginean dagoen kafetegi mitiko hau duela mende bat sortu zen, «Café Madrid» izenarekin.
Gaur egun, kafetegi-jatetxea izateaz gain, kultur jarduerak ere antolatzen ditu: literatura-solasaldiak, argazki-erakusketa iraunkorrak eta kafe-antzerkia, besteak beste.
Hartu kafe bat historiaz inguratuta!
Badakizue, Logroñora joaten zareten hurrengoan, gogoratu gure ibilbidea edo sortu zeuena…
Baina, batez ere, jarraitu esaera zaharrari:
«Ez fidatu ardorik edaten ez duenaz, ezta gehiegi edaten duenaz ere».
BIDAIAKO INFORMAZIOA:
Autokarabanaz edo kanperrez gaua pasatzeko: Logroñoko autokarabanentzako gunea
