SANTA KLARA UHARTERA ITSASONTZIZ: EGUN BAT DONOSTIAN
Oraingoan, gure furgonetak, “Nautilus” izenari ohore eginez, Donostiako txoko magiko batera eramango gaitu. Udako egun bat da, ilea hareaz beteta dugula, bustita eta galerna bete-betean eserita. Santa Klara uhartean aurkituko gaituzue.
Kontxako badiaren erdian kokatuta, Santa Klara uharteak ez du altxorrik gordetzen, ezta piraten ezkutalekurik ere. Hala ere, Karibeko uharte askok berentzat nahiko luketen xarma naturala du.
Uharteko moilara iristeko, ahal bada goiz, Motoras de la Isla konpainiaren motorontzia hartu behar da, Donostiako portuko ontziralekutik abiatzen dena. Bidaiak 15 minutu inguru irauten du, eta badiatik barrena egiten den ibilaldi atseginaz gozatzeko aukera ematen digu. Goza ezazue!
Uharteko moilara iristen gara, eta berehala konturatzen gara zerbitzu guztiak dituen hondartza txiki bat dela.
Urre-koloreko harearen ondoan ez dira falta igerileku natural bat, sorospen-postua eta beroari aurre egiteko trago bat hartzeko taberna, behar izanez gero.
Tontorrera eramaten gaituen bidetik igotzen bagara, gizakiak mimoz zaindutako naturagune eder bat aurkituko dugu.
Primeran datozkigu bertako instalazioak: itzalpean harrizko mahaiak daude, etxean egindako patata-tortilla bat jateko aproposak (edo Donostiako Alde Zaharreko Juantxon eskatutakoa); harrizko harraska duen iturri bat ere badago, baita freskatzeko dutxa bat ere, bainatzeko gunera dauden metro gutxi horiek jaitsi beharrik gabe.
Goialdean, gainera, itsasargia aurkitzen dugu. Handik badiaren ikuspegi ederrak ditugu, eta Donostia beste ikuspegi batetik ezagutzeko aukera eskaintzen digu.
Arratsaldean, 17:00ak aldera, kostaldeko ordu sorgindua hasten da, eta galerna izugarria altxatzen da. Jendeak presaka alde egiten du uhartetik, lehorrera itzuli behar dituzten motorontzien joan-etorriek ahalbidetzen duten bezain azkar.
Familia batzuk, ia guztiak bertakoak, uretan edo itsasertzean geratzen gara, haizearen haserrea eta itsasoaren amorrua baretu arte itxaroten… Eta azkenean, arratsaldea ilea hareaz beteta, bustita eta tabernako barran kafesne ebaki bat eta izozki bat hartuz amaitzen dugu.
BIDAIAKO INFORMAZIOA:
http://www.motorasdelaisla.com/
