Zer ikusi Bukaresten autokarabanaz | Ezinbesteko 7 leku

Bukarestera autokarabanaz edo kanper furgonetan bidaiatzen baduzu eta Bukaresten zer ikusi begirada batean jakin eta haren historiako bitxikeria batzuk ezagutu nahi badituzu; Errumaniako hiriburua nola bisitatu zalantzak badituzu eta Bukaresten bihotzean gastronomiaz eta Errumaniako plater tipikoez gozatu nahi baduzu… Hau da zure artikulua. Hori guztia eta askoz gehiago kontatuko dizugu, Bukarest bisitatzeko ezinbesteko 7 lekuren bidez.

Jarraitu irakurtzen eta ezagutu Bukaresteko onena.

✳️ZER IKUSI BUKARESTEN OINEZKO IBILBIDE BATEAN | GALDU EZIN DITUZUN 7 LEKU

Bukarest ohiko zirkuitu turistikoetatik kanpoko Europako hiria da, estutasunik eta jendetzarik gabe paseatzeko aukera ematen duena. Gainera, aldameneko Budapesten dotorezia ez badu ere, giro autentikoaren xarma du: bertako biztanleek hirigunean bizitzen jarraitzen dute, eta alde zaharrak interes handiko eraikin historiko ugari gordetzen ditu, Ceausescu diktadorearen gehiegikerietatik salbatu zirenak. Gainera…

👁️‍🗨️ Ba al zenekiten… Bukarest ‘Paris txikia’ izenez ezagutzen dela?

Izan ere, Bukarestek eraikin historikoen bilduma ederra du, ia guztiak hiriko alde zaharrean oinezko ibilbide batean bisitatzeko modukoak. Bere garaipen-arkua eta erromatar ateneoa ere baditu.

Errumanian autokarabanaz, kanperrean edo autoz bidaiatzen baduzu, ez izan zalantzarik: eskaini pare bat egun Bukarest, Paris txikia, ezagutzeari. Ziur gaude harritu egingo zaituela.

🛞 BUKARESTEKO PARLAMENTUA| Errumaniako eraikin enblematikoena

Bukaresten ikusi beharreko lekuetako bat, autokarabanaz bidaiatu nahiz autokarabanarik gabe, Errumaniako parlamentua da.

Hasteko, esango dizugu begiak zabal-zabalik geratu zitzaizkigula eraikin honen tamaina ikusita. Txundigarria da. Nicolae Ceaușescu diktadorearen nahierara eraikitako eraikin erraldoi hau munduko bigarren handiena da tamainaz, Pentagonoaren ondoren.

Gainera, erraldoi honen historia oso gordina da. Ba al dakizu zenbat suntsitu behar izan zuten eraikitzeko? Auzo oso bat, Urano auzoa, gauetik goizera desagertu zen: inolako begirunerik gabe 10.000 etxebizitza baino gehiago eraitsi zituzten, eta 58.000 biztanle baino gehiago lekualdatu. Gainera, hamabi eliza, hiru monasterio eta bi sinagoga ezabatu zituzten hiriko mapatik.

Nicolae Ceauşescu erori ondoren, eraistea pentsatu zuten, baina mantentzea baino garestiagoa zen.

Gaur egun munduko eraikin zibil handiena da, eta barruan 11 solairu eta 1100 gela daude, bulegoetarako, bilera ofizialetarako eta bi museotarako.

Errumaniako parlamentuak edo Herriaren Etxeak, eraikina ezagutzen den bezala, Bukaresteko bisita zapore gazi-gozoarekin hastea eragiten du. Baina ziur gaude Bukarestek sorpresa handiak gordetzen dizkigula. Jarraituko dugu?

🛞 LIPSCANI AUZOA | Bukaresteko bihotza

Parlamentutik paseoan irits daiteke Bukaresteko alde historikora. Han, Vlad Draculen aginduz eraikitako antzinako Lipscani auzoa bisita dezakezu. Hiriko bilakaera ulertu nahi baduzu, Lipscani auzoa da Bukaresten ikusi behar duzun lekua.

Bigarren Mundu Gerraren ondoren eta Ceaușescuren diktadura boterera iristearekin batera, alde zaharra eta monumentu erromantikoak suntsitu zituzten kasu askotan. Lipscani auzoak, ordea, eutsi egin zion. Horregatik, Lipscani lekurik onena da eraikin zaharrak eta modernoak harmonian nola bizi diren ikusteko, Bukarest herrialdeko historiaren lekuko leial bihurtuz. Macca Vilacrosse pasabidea, Stavropoleos monasterioa eta Caru cu Bere antzinako garagardotegia hiriak gordetzen duen erresistentzia eta kultura- zein arkitektura-nahasketa horren hiru adibide on dira.

Kaleetan noraezean ibiltzea eta bidean aurkituko dituzun askotariko monumentuez gozatzea aholkatzen dizugu. Hala ere, Bukaresten galdu ezin dituzunak adieraziko dizkizugu: Macca Vilacrosse pasabidea, Stravopoleos monasterioa eta Caru Cu Bere garagardotegi historikoa.

🛞MACCA VILACROSSE PASABIDEA

Europako hiri askok merkataritza- eta turismo-gune berezia osatzen duten galeriak dituzte. Europan egindako beste bidaia batzuetan Nanteseko Passage Pommeraye galeriak edo Bruselako Saint-Hubert galeriak ezagutu ditugu. Bada, Bukarestek ere baditu bereak. Lipscani auzoaren bihotzean dago Macca Vilacrosse pasabidea.

Garai komunistan, hiriko bitxi-denda adierazgarrienak pasabidean kokatu ziren. Horregatik, izena aldatu zioten, eta urte luzez “Bitxi-denden Pasabidea” izenez ezagutu zen, 1990ean jatorrizko izena berreskuratu zuen arte.

Gaur egun, estilo frantseseko Macca Vilacrosse pasabideak burdinazko egitura batez estalitako bi korridore ditu. Sepia-tonuko beirateek giro bero eta atsegina sortzen dute, eta kolore epelak, landare naturalak eta pasabide osoan sakabanatutako sofa-ilarak geratzera eta esertzera gonbidatzen gaituzte, ardo-kopa bat hartzeko edota shisha bat erretzeko.

Ez zaigu bururatzen Bukaresten bisitatzeko eta lasaitzeko tarte bat hartzeko leku hoberik.

🛞 CARU CU BERE, Bukaresteko garagardotegi historikoa

Bukaresteko alde historikoaren erdian non jan galdetzen badiozu zeure buruari, leku ezin hobea dugu, Errumaniako plater tipikoez eta giro bereziaz gozatzeko.

Azkenik, ez ahaztu garagardo-pitxer batzuk eskatzea: hiriko garagardotegirik zaharrenetako batean zaude, eta nortasun bereziko garagardoa ekoizten dute.

Txundituta atera ginen, giroarekin, dekorazioarekin, zerbitzuarekin eta eskaintzen dituzten anoa izugarriekin. Benetan gomendatzen dugu.

🛞 STAVROPOLEOS MONASTERIOA

Eraikin moderno altuen artean denboran izoztuta dirudien Stavropoleos eliza txikia Bukaresten hiriko oinezko paseo honetan ikus daitezkeen kontrasteen adibide argia da.

1724an eraikitako Stavropoleos eliza, egiaz, arkitektura-multzo zabalago baten parte zen, elizak berak, monasterio batek eta ostatu batek osatua. Zoritxarrez, XIX. mendearen amaieran monasterioa eta ostatua eraitsi zituzten. Elizarentzat ere patu bera aurreikusten bazen ere, azkenean zaharberritu egin zuten, eta gaur egun beste garai batzuetako eraikinen nahasketaren artean perla txiki bat da.

Stavropoleos elizaren kanpoaldeak albotik igarotzen den oro liluratzen du. Sarrera arkupedun eder batek barrualdera eramaten gaitu, non hormak eta sabaiak freskoz eta dekorazio-elementu deigarriz estalita dauden, erlijio-artearen eta bizantziar artearen bilduma ederra osatuz. Ezagutu, gainera, elizak gordetzen duen intsentsu-ontzien bilduma handia.8

📝 Stavropoleos elizako sarrera doakoa da, eta barruan argazkiak ateratzea baimenduta dago.

🛞 GARAIPENAREN ETORBIDEA

Garaipenaren etorbidea, errumanieraz Calea Victoriei, Bukaresteko kalerik garrantzitsuena  eta zaharrena ere bada. Hiria zeharkatzen du bere bihotzetik, alde historikotik, Garaipenaren plazaraino.

Garaipenaren etorbidea kale historikoa da, 1692an Constantin Brâncoveanu printzearen aginduz eraikia, alde zaharreko Errege Gortea eta hiriburutik gertu dagoen Mogoşoaia herriko bere jauregia lotzeko.

Garaipenaren etorbideak bere garrantzia mantendu du historian zehar. Argiztapena izan zuen Bukaresteko lehen kalea izan zen, 1814an kandelekin argiztatua. Zolatu zuten lehena ere izan zen (1845). Gaur egun hiriko kalerik garrantzitsuena izaten jarraitzen du, eta hotel, bitxi-denda eta luxuzko denda gehien biltzen dituen lekua da. Gainera, hiriko monumentu eta eraikin aipagarri askok kale honetara ematen dute; adibidez: Cantacuzino jauregiak, erromatar ateneoak, Iraultzaren plazak edo Historia Naturaleko Museoak.

Kale hau goitik behera zeharkatzea ezinbestekoa da Bukaresteko bisita batean, eta bisitatu beharreko lekuetako bat da.

🛞 BUKARESTEKO ITURRIAK| Piața Unirii

Bukaresten egon eta iturri bikainak ez bisitatzea benetako akatsa litzateke. 1980ko hamarkadaren amaieran eraikitako 44 iturri independenteko multzoaz ari gara, Ceauseascu diktadorearen handitasun-ametsen isla gisa.
Iturri-sistema Piața Unirii inguruan dago, parlamentura eramaten duen pasealekuaren aurretik. Horrela, 1,4 kilometroko tartea hartzen du Parlamentuaren Jauregiaren inguruan, munduko administrazio-eraikin handienaren inguruan. 
Iturriak berez miragarriak dira, eta udako gauetan, astebururo, ikuskizun bihurtzen dira.
44 iturriko multzo harrigarri hau gauero jartzen da martxan, argi, ur, musika eta kolorezko benetako ikuskizuna eskaintzeko. Koreografiak ur-zurrustak musikaren erritmoan dantzarazten ditu, kolorez jantzita.

📝Noiz eta non ikusi Bukaresteko iturrien ikuskizuna?

Bukaresteko iturrien ikuskizunaz udako asteburu guztietan gozatu ahal izango duzu, Piața Unirii inguruan.
21:30ean hasten da, baina lekua hartzeko pixka bat lehenago iristea gomendatzen dizugu. Ikuskizunak 45 minutu irauten du, eta munduko iturri-sistemarik handienarekin txundituta geratuko zara. Jakina, joan blai amaituko duzula jakinda.

👁️‍🗨️ Ba al zenekien…
Bukaresteko iturri-sistema euskal enpresa batek zaharberritu zuela 2018an?

Bai, ondo irakurri duzu: munduko iturri-sistemarik handiena Ezarriren gresite onenarekin zaharberritu zuten. Ikaztegietako (Gipuzkoa) enpresa honek mosaikoak egiten hasi zuen bere ibilbidea, eta gaur egun, Lazkaon kokatuta, munduko erreferentea da mota honetako lanetan.

Ezarrik arrakastaz zaharberritu zituen Bukaresteko 44 iturriak, hau da, 10.200 metro koadro, 4 hilabeteko denbora errekorrean.

✳️NOLA MUGITU BUKARESTEN | Gure esperientzia kanper furgonetan

Bukarest paseatuz ezagutzeko moduko hiria da. Kontatu dugun bezala, monumentu eta interesgune gehienak alde historikoan daude, Lipscani auzoan, edo handik oso gertu.

Autokarabana edo kanperra hiritik kanpo aparkatzea eta han gaua pasatzea gomendatzen dizuegu, eta erdigunera Uber taxi bat hartuta iristea. Ohartarazten dizuegu bertako taxi baten eta Uber baten arteko prezio-aldea nabarmena dela. Gainera, egiaztatu ahal izan genuen Bukaresteko taxilariek zerbitzurako tarifa bakar bat adostu ez duten bitartean, Uber aplikazioaren bidez hasieratik jakingo duzula bidaiaren azken prezioa.

✳️BUKARESTEN GAUA PASATZEA AUTOKARABANAZ EDO KANPERREAN

Baliteke autokarabana non aparkatu edo utzi galdetzea, hiriaz oinez gozatu ahal izateko. Bada, Bukarestek ez du autokarabanentzako gunerik ezta kanper ibilgailuak hartzeko antzeko espaziorik ere. Guk aurkitutako aukera hiritik 12 km-ra dagoen kanpin batean kanpatzea izan zen (kontsultatu bidaia-mapa). Autokarabanarako era guztietako zerbitzuak ditu: ur grisak eta beltzak husteko aukera, dutxak, komunak eta aulkiak zein mahaiak ateratzeko partzelatu gabeko espazioak.

Kanpinetik Bukaresteko erdigunera Uber bat hartu genuen, eta bidaiak 9€ balio izan zigun.

Errumaniara autokarabanaz edo kanper furgonetan bidaiatzeko asmoa baduzu, jakin behar duzu mapa interaktibo bat dugula, Errumanian barrena doazen 8 ibilbide handirekin, bisitatzeko lekurik interesgarrienekin eta kanpinak, aparkalekuak eta gaua pasatzeko lekuak biltzen dituzten 60 kokapen baino gehiagorekin, klik bakar batean nahi duzun lekura nabigatzeko. Errumanian bidaiatzeko gure mapa interaktiboa hurrengo estekan lor dezakezu⤵️

Ikusten duzunez, Bukarest kontrastez betetako hiria da, historia hurbilak oso markatua eta turismoaren aldetik gutxi ezagutarazia; horrek are interesgarriagoa egiten du. Artikulu hau irakurri ondoren Bukarest autokarabanaz edo kanperrean bisitatzea errazagoa izango dela espero dugu, eta Bukaresten zer ikusi zenituen zalantzak argitu izana.

Errumanian autokarabanaz edo kanper furgonetan bidaiatzen jarraitu nahi duzu? Jarraitu gure estekari, eta ezagutu Errumania ezagutzeko diseinatu ditugun 8 ibilbideak⤵️

Ibilbide on!