MONTE HOLIDAY KANPINA: EKOTURISMOA ETA DIBERTSIOA ~ FurgoBidaiak

Monte Holiday kanpina ezagutzea kasualitate polita izan zen. Zuhaitzetako etxolei, inguruko paisaiaren edertasunari eta abentura anitzeko jarduerei buruz entzuna genuen… Baina, zuk ere ezagutu nahi duzu, ezta?

Kanpina Gargantilla del Lozoya herrian dago, Guadarramako mendilerroko Parke Nazionalaren bihotzean (Madril), Donostiatik hiru ordu eta erdi ingurura. Egia esan, ez dugu etxe ondoan, baina patuaren kontuak tarteko, hainbat familia bidaiari eta blogari han elkartzekoak ginen maiatzeko zubiaz gozatzeko. Beraz, kanpina eta ingurune zoragarria ezagutzeko gogo handiz joan ginen.

Gure lagunen ondoan, 100 m² inguruko lursail zabal batean kokatu ginen. Lursailak lauak dira, eta belar-geruza bigun eta gozoa dute… Izugarri gustatzen zaigu horrela izatea; bestela, hautsa eta lokatza furgonetako bazter guztietara sartzen dira.

Haurrak zituzten lau familia ginenez, berehala joan ginen komunak ikustera. Aurrez esan ziguten bezala, mendialdean fresko egiten zuen, eta eskertzekoa zen komunetako berogailua martxan egotea. Horrela ez du batere nagirik ematen!

Familian gozatzeko gehien gustatu zitzaigun jardueretako bat kanpineko baserria bisitatzea izan zen.

Eta galdetuko duzue: kanpinean baserri bat al dago?

Bada, bai!

Baina hau ez da ohiko baserria, ezta ohiko bisita ere: «Hemen baratzea», «hemen txerriak», «hemen oiloak»…

Antzeztutako bisita bat da, non Nicanora eta Hortensia, mendialdeko bi emakume eskarmentudun, beren umore eta jakinduria guztiarekin baratze ekologikoan zehar gidatzen gaituzten.

Haurrentzako arrautza-bilketa antolatzen dute, eta animaliei beldurrik eman gabe jaten nola eman erakusten digute…

Irakaspen handiko bisita da, eta bertan ~~txikiek~~ guk sekulako barreak egin genituen.

Zeinen ondo pasatu genuen!

Eguraldiarekin ez genuen zorte handirik izan. Mendialdeko haize fin eta hotza ibili zen, eta tarteka euria egin zuen.

Une horiek aprobetxatu genituen txikienentzako antolatutako jardueretara hurbiltzeko, El Fogón de Guille jatetxe-kafetegiko gune batean.

Haurrek primeran pasatu zuten karaokean parte hartzen, baita arrakasta handia izan zuen txotxongilo-emanaldian ere.

Txotxongilo bat ere ekarri genuen etxera!

Orduan aprobetxatu genuen, halaber, El Fogón de Guilleren espezialitateak dastatzeko.

Guri izugarri gustatu zitzaigun onddoz egindako risotto krematsua!

Eguzkia berriro agertu zenean, abentura anitzeko parkeaz eta trebetasun-zirkuituaz gozatzeko aukera izan genuen.

Egia esan, nik, altuerei beldur pixka bat diedanez, argazkiak ateratzeari ekin nion.

Baina argazkiren bat ikustea besterik ez duzue behar besteek zeinen ondo pasatu zuten ikusteko!

Erreserbatuta geneukan abentura anitzeko zirkuituak bi altueratan antolatutako trebetasun-ibilbidea zuen: beheko zatia, lurretik gertuago zegoena, haurrentzat egokitua; eta goiko zatia, helduentzat.

Adrenalina barra-barra ibili zen tirolinan jaitsi zirenean. Bati baino gehiagori oihu eginarazi zion!

Baina lasai, jarduera guztiak begirale espezializatuen zaintzapean eta ekipamendu egokiarekin egiten ziren (arnesak, kaskoak…), behar den bezala. 😉

Hainbeste emozioren ondoren, lasaitasun pixka bat behar genuen. Horregatik, familian paseatzeko tarte bat bilatu genuen.

Gato Montés bidezidorrak kanpinaren goialdetik eraman gintuen.

Handik Lozoya haranaren eta mendilerroaren edertasuna bere osotasunean miretsi ahal izan genuen.

Gainera, paseoan Monte Holidayren beste erakargarritasunetako bat aurkitu genuen: zuhaitzetako etxola xarmagarriak.

Ingurune naturalean ezin hobeto integratutako egurrezko «etxetxoak» dira.

A zer edertasuna!

Egia esan, furgoneta izan ez bagenu, horietako batean egingo genuen lo!

Gure semeari izugarri gustatzen zaio ura, eta jakin-min handia zuen igerilekua non zegoen jakiteko. Beraz, ikustera joan ginen.

Igerileku eder bat aurkitu genuen, zuhaizti berde batean kokatua, nahiz eta oraindik martxan ez egon.

Kanpineko komunak bezala, mugikortasun urriko pertsonek erabiltzeko egokituta dago.

A zer pena bainu bat hartu ezin izana…

Baina, ondo pentsatuta, hori izan daiteke itzultzeko izango ditugun aitzakia ugarietako lehena.

Guadarramako mendilerroak berak ere naturarekin harremanetan egoteko aukera amaigabeak eskaintzen ditu. Beraz, inguru honetan ez da inoiz plan onik faltako.

Guk, eskualdearekin izan genuen lehen harreman honetan, trenbide abandonatuen gainetik ibilaldi bitxi bat egin genuen.

Handik gertu dagoen Pinilla del Vallen, Neandertalen Haranera bisita gidatua ere egin genuen.

Aztarnategi paleontologiko honek modu liluragarrian erakusten digu nola bizi ziren neandertalen komunitateak glaziazioaren aurretik, orografia berezia duen haran honetan.

Gainera, ingurune honetan bakarra da.

Bisita gidatua kontratatzea gomendatzen dizuegu.

Hain ondo azaltzen dute dena, non haitzuloetako garaira bidaiatu duzula sentitzen duzun!