KANPERREZ BIDAIATZEKO PRESTAKETAREN GAKOAK
Urtero kontu bera!
Helmuga bat aukeratzen dugu, eta gero, arrazoi batengatik edo besteagatik, behin eta berriro aldatzen dugu, azkenean gutxien espero genuen lekuan amaitu arte.
Ez dakit zuei ere gauza bera gertatzen zaizuen, baina egia esan, nekagarria da!
Baina helmuga aukeratzeaz gain, beste gauza asko prestatu behar dira.
Oraindik ez daukazue argi?
Kanperrez bidaiatzeko prestaketan lagungarri izango zaizkizuen gako batzuk emango dizkizuegu.
Ia beti, udako oporrak iristen direnean, gustuko dugu etxetik atera eta mugak zeharkatzea, ohiturak eta ordutegiak erabat aldatzea, plater berriak dastatuz gure ahosabaia aberastea eta, zergatik ez, Europako hizkuntzaren baten ikastaro trinko bat egitea.
Baina argi daukaguna da, helmuga aukeratzeaz gain —bidaia bera antolatzen hasteko ezinbesteko pausoa—, arreta handia jarri behar diegula gure furgonetarekin, Nautilusekin, korronteak eramaten gaituen lekura «itsasoratzeko» lagungarri izango zaizkigun prestaketa guztiei.
1.- GOAZEN, BAGOAZ! HELMUGA AUKERATZEA
Helmuga aukeratzea izaten da etxean eztabaida gehien sortzen duen kontua.
Dena galdera berarekin hasten da:
Zenbat egun ditugu?
Izan ere, dauzkagun egunen arabera, «muga gehiago edo gutxiago zeharkatu» ahal izango ditugu.
Helmuga aukeratu ondoren, bidaia-gidaren bat kontsultatu beharko dugu (Lonely Planet gure gogokoenetako bat da), eta interesguneak aukeratu (parke naturalak, hiriak, hondartzak, herriak…).
Era berean, helmugaraino joateko egin beharreko kilometroak, bisitetan egingo ditugunak eta itzulerakoak kalkulatu beharko ditugu.
Gure ustez, ez du merezi milaka kilometro egiteak 13 egun baino gutxiagoko bidaia baterako.
Aurrekontua, diru madarikatua!
Helmuga bat edo beste aukeratzerakoan eragin handia dauka, baina ez gara gai horretan sartuko, oso subjektiboa eta pertsonala baita.
Hala ere, dena zinemako esaldi ospetsu bat kanper mundura egokituz laburtzera ausartuko gara:
«Beti izango dugu PORTUGAL».
Ez, ez!
Nik hondartzara joan nahi dut!
Urpeko betaurreko berriak estreinatu nahi nituzke!
Oihukatzen du gure semeak bere logelatik.
Bale, hemen hasten gara «Super Tacañones» delakoen ahotsa entzuten («Un, dos, tres» saioan bezala).
Ez du esan nahi berak esandakoa egingo dugunik, baina haurrak kontuan hartu behar dira.
Haiengan pentsatuz helmuga aukeratzea eta elkarrekin adostea oso zentzuzkoa da.
Azken finean, hau Furgo Bidaiak Familian da, furgonetaz eta familian egindako bidaiak…
Eta uharte batera joango bagina?
Uharte batera joatea eta ferrya hartzea pentsatzen dugunean, batez ere bi gauza hartu behar ditugu kontuan:
Lehenengoa, bidaiaren aurrekontuan izango duen eragina; eta bigarrena, helmugaraino ferryan zeharkatzeko beharko dugun denbora.
Gomendio orokor gisa, eta gure esperientzian oinarrituta, ferryen prezioak gehiegi igo ez daitezen, hiru hilabete inguruko aurrerapenarekin erreserbatu beharko genituzke.
Gainera, esan dezakegu itsas konpainien webguneek ez dituztela beti bidaiatzeko preziorik onenak eskaintzen.
Bestalde, «Camping on board» modalitatea ere ezagutzen dugu.
Oso ohikoa da Grezia eta Italia arteko ferryetan. Modalitate horretan, autokarabana eta kanper furgonetek beren autonomia erabiltzen dute ferryan bidaiatzen duten bitartean.
Pena horrelako aukera han bakarrik izatea!
Azkenik, esango dugu kanper mundu zoragarri honetan lehen urratsak egiten ari direnentzat agian onena autokarabanekin atsegina den helmuga bat aukeratzea dela.
Izan ere, ez da gauza bera «kanperren lagun» den herrialde batera bidaiatzea, adibidez FRANTZIARA, non badakigun harrera ona egiten digutela, gure ibilgailuentzako zerbitzuak ditugula eta supermerkatu handietan erosketak egiteko aparkatzea ere errazten digutela; edo zerbitzurik gabeko herrialde batera joatea, non agian mesfidantzaz begiratuko diguten.
Mugak zeharkatu gabe ere adibide ugari ditugu…
2.- NON EGINGO DUGU LO GAUR?
Helmuga aukeratu ondoren, bidaiaren ibilbide osoa estaliko duen gaua pasatzeko lekuen zerrenda prestatu beharko genuke.
Izan ere, oso abenturazaleak izan arren edo azkenean leku horiek erabili ez arren, inork ez du nahi gaueko ordu txikietan lurralde ezezagunetan bueltaka ibili, non lo egin jakin gabe, ezta?
Izenburu horrekin berarekin, duela denbora bat autokarabana eta kanper furgoneten erabiltzaileok eskura ditugun aukeren bilduma bat argitaratu genuen, gure iritzi apalean oinarrituta.
HEMEN kontsulta dezakezue.
3.- MAHAI ONAREN BUELTAN
Furgonetako jaki-biltegia betetzea ez da lan makala.
Eta ez gara kostu ekonomikoaz bakarrik ari, bidaia luze baterako ondo antolatzen ez badugu buruhauste handiak eman baititzake.
Oro har, gure erronkarik handiena eramaten ditugun elikagaiek ahalik eta dieta orekatuena eskaintzea izaten da (gogoratu haurrekin bidaiatzen dugula).
Horretarako, denbora luzez irauten duten produktuak aukeratzen ditugu, eta agian bisitatuko ditugun herrialdeetan aurkituko ez ditugunak.
Baina batez ere, furgonetako jaki-biltegia prestatu aurretik galdera oso sinple bat egin behar diogu geure buruari:
Nolako prezioak dituzte elikagaiek bidaiatuko dudan herrialdean? Nire ohiko supermerkatuan baino garestiagoak ala merkeagoak?
Etxean baino garestiagoak badira, adibidez SUITZAN, gure ustez egokiena denetarik duten kutxa pare bat eramatea da, eta bidaian zehar haien edukia kontsumitzea.
Salbuespena produktu freskoak izango dira: ogia, fruta, haragi pixka bat, arraina eta barazkiren batzuk. Horiek bidean erosiko ditugu.
Herrialde horretan erosketak garestiagoak ez badira, ez da beharrezkoa jaki-biltegia hain zorrotz prestatzea, eta arinago bidaiatu ahal izango dugu.
Edari alkoholdunei aparteko atal bat eskaini beharko genieke.
Oro har, ardoa, garagardoa eta antzekoak gustatzen bazaizkizue, Europako zenbait lekutan prezio izugarriak dituzte.
Beraz, utzi lekutxo bat haientzat, bestela damutuko zarete.
Gure furgonetan ez dira inoiz falta txakolina, bermut-a eta Astigarragako sagardoa, noski.
Eta zuenean?
Azkenik, ez dugu ohitura on bat aipatu gabe utzi nahi: etxean prestatutako janaria tuperretan eramatea.
Izan ere, amaren piper beteak bezalakorik ez dago, ezta?
Esango dizuegu etxeko marmeladak ere eramaten ditugula, nik neuk eginak…
Maniak ote dira? 🙂
4.- ORDENA, ETA GERO ORDENAGAILUA
Bidaia askoren joan-etorriekin, jantziak aukeratzeko urrezko hiru arau ikasi ditugu:
- Hamar egunetarako ezinbestekoa den arropa bakarrik eramatea. Hamargarren egunetik aurrera garbitzea tokatuko da, eta berriro hastea.
- Eguraldia aldakorra izan daiteke; beraz, gure furgonetan inoiz falta ez diren bi jantzi daude (basamortura joan arren): bainujantzia eta euritakoa.
- Antolatu arropa ahalik eta leku gutxien har dezan. Nola egiten dugun ikusi nahi duzu?
5.- PAPER ARTEAN IGERIAN
Ez. Ezin gara etxetik atera bidaian zehar noizbait beharko ditugun dokumentu guztiak behar bezala prestatuta eraman gabe.
Nortasun-agiria eta gidabaimena.
Europako Osasun Txartelak. Gizarte Segurantzaren bulegoetan eskatzen dira, eta bi urterako balio dute.
Familia-liburua. Haurrekin bidaiatzen badugu, kanpin batean ostatu hartzeko ere eska diezagukete, ITALIAN igarotako azken oporretan gertatu zitzaigun bezala.
Ibilgailuaren Txartel Berdea. Bai, aseguru-etxeak ematen dizun hura, eta inoiz eskatzen ez dizutena.
Harik eta KROAZIA eta Bosnia arteko mugara iritsi eta gelditzen zaituzten arte, guri gertatu zitzaigun bezala.
6.- EGIN IEZAIOZU AZTERKETA BAT
Ez naiz atal honetan gehiegi luzatuko, denok baitakigu gure ibilgailuekin bidaian «itsasoratu» aurretik bete beharreko gutxieneko baldintzak zeintzuk diren.
Konfiantzazko tailer batean azterketa on bat egiteak susto bat baino gehiago saihestuko digu.
Urte batzuk bidaiatzen eman ondoren, bidaia bati ekiteak eta milaka kilometro egiteak ez digu bihotza lehen bezainbeste azkartzen.
Baina buruak mila buelta ematen jarraitzen du hainbeste prestaketarekin!
Artikulu hau gure esperientzietan oinarrituta idatzi dugu, eta badakigu guztiz subjektiboa dela.
Pozik geratuko gara furgonetaz edo autokarabanaz bidaiatzeko mundu zoragarri honetan lehen urratsak egiten ari direnentzat lagungarria bada, bidaiak prestatzeko lan neketsu honetan nondik hasi jakiteko.
Eta esperientzia handiagoa dutenekin, agian punturen batean bat etorriko ginen, ezta?
Esperientziadunak eta hasiberriak; hasiberriak eta esperientziadunak…
Erabaki al duzue dagoeneko uda honetako ibilbidea?
Egin klik eta aukeratu bidaia.
Bidaia ona izan dezazuela!
