CARCASSONNE GABONEZ JANTZITA

Ezpata-borrokak, Erdi Aroko azokak, zuzi-jaitsiera, izotz-patinajeko pista dotore bat, Gabonetako erakusleiho ikusgarriak, gozokiak, ardo beroa eta, batez ere, Gabonetako argiak, jolasak eta dibertsioa… Horiek dira «Kataroen Hiriburuak» urteko sasoi berezi honetan eskaintzen dituen erakargarrietako batzuk. Gabonez jantzitako Carcassonne ezagutu nahi duzue?

Carcassonne Frantziako hego-ekialdean dago, Languedoc eskualdean, eta Aude departamenduko hiri nagusia da. Ipuinetako herri txiki baten itxura du, eta bi zatitan banatuta dago: La Cité, harresiz guztiz inguratutako Erdi Aroko hirigune zoragarriak osatua, eta La Bastide Saint-Louis, Saint-Louis erregearen agintaldian, 1260an, eraikitako bastida. Azken hori Aude ibaiaren beste ertzean dago, Le Pont Vieux zubia zeharkatuta.

Sortzez Garbiaren jaiegunaren inguruko zubi luzea aprobetxatu genuen bertara bidaiatzeko eta hain turistikoak ez diren egun batzuetan hiria ezagutzeko.

Nola antolatu dugu bisita? Ez genuen Gabonetako azokaz bakarrik gozatu nahi, hiria ere ezagutu nahi genuen. Izan ere, azaldu dudan bezala, oso desberdinak diren bi eremutan banatzen da, eta bakoitzak hiriaren beste aurpegi bat erakusten du. Azkenean, eguneko argi-orduak La Cité bisitatzeko eta bertako Erdi Aroko xarmak miresteko aprobetxatzea erabaki genuen. Hauek dira:

• La Porte Narbonnaise eta Pont Levi (Erdi Aroko hirigunera sartzeko ate nagusia eta zubi altxagarria).
• Saint-Nazaire basilika.
• Château Comtal edo Kondearen gaztelua.
• La Palestra.
• Harresiak.
• Putzu handia eta txikia.

Baina… horiek Turismo Bulegoan emango lizkiguketen gomendioetako batzuk baino ez dira. Guk zerbait gehiago bilatzen genuen. Pixkanaka ezagutuko dugu.

Ostirala, abenduaren 5a

Ilundu aurretik hasi genuen bisita, baina Porte Narbonnaise atean lehen Gabonetako argiak eta apaingarriak aurkitu genituen. Egia esan, ez zuten zerikusi handirik kalean antolatutako Erdi Aroko giroarekin. Zaldun, ezpatalari eta Erdi Aroko merkatari jantzitako pertsonaiak hara eta hona zebiltzan, turistak entretenitzeko borrokak eta liskar txiki antzeztuak antolatzen.

Narbonako atea hiriaren ekialdean dago, eta 1280 inguruan eraiki zuten. Bere izenak Narbona hirirantz duen orientazioari egiten dio erreferentzia. Bi dorre handi ditu. XIX. mendean, Viollet-le-Duc arkitekto paristar ezagunak almenak eta teilatuak berreraiki zituen, eta Pont Levi zubi altxagarria gehitu zuen, jatorrian ez baitzegoen.

Porte Narbonnaise, lantzak eskuan dituzten soldadu serioek zainduta.

Harresien barruan gaudela, La Palestra (Les Lices) ikustera hurbiltzen gara, bi harresi-eremuen arteko espaziora. Gure bisitan, bat-bateko Erdi Aroko postuak zeuden bertan.

La Palestrak kilometro bat baino gehiagoko perimetroa du, eta XIII. mendean egokitu zuten, bigarren harresia eraiki zutenean.

Hiriaren historiako garai batean, behartsuek espazio hau hartu zuten beren txabolak eraikitzeko, baina XIX. mendean, Viollet-le-Ducek gotorlekua zaharberritu zuenean, txabolak eraitsi zituzten.

Kaleetan barrena paseatzen dugu eta giroaz gozatzen dugu. Turista asko egon arren, ez dago udako egunetan sentitzen den jendetza itogarririk. Harresien barruan, bertako biztanleek, turistek eta Erdi Aroko pertsonaiek osatutako nahasketa bitxia dago.

Baina iritsi da unea, eta Turismo Bulego batek ere bere liburuxketan oraindik jaso ez dituen plazer txiki horiek erakutsiko dizkizuegu:

1. Itsatsi sudurra Gabonetako erakusleihoetara eta begiratu lotsarik gabe, dendako jabeak zeharka begiratzen badizue ere…

2. Jan eta edan. Ez da beti jatetxe, taberna edo bouchon batera joan behar. Frantzian kalean bertan gozatzeko plazer txiki ugari daude, bereziki garai honetan. Horregatik, gozokiak erostea gomendatzen dizuegu.

Nougat delakoa, adibidez, Gabonetan erosi ohi den almendra-turroi gogorraren lehengusu moduko bat da. Eztiarekin, karameluarekin, izpilikuarekin, pistatxoekin edo hurritzekin egiten da… eta testura biguna du, hortzek eskertzen dutena. Ezagunenak Montélimarren egiten badituzte ere, hauek ez dute haien inbidiarik. Opari ezin hobea izan daiteke, edo autokarabanara eramateko postre aparta.

Gure ahosabai zorrotza oraindik gustura ez badago, aurkezpenik behar ez duen beste gozoki baten bila jo dezakegu: gaufre delakoa, gofre bat. Txokolatezkoa izan dadila, mesedez!

Hori guztia irensten laguntzeko, hartu vin chaud bat: ardo beroa, besteak beste, ronarekin, limoiarekin, kanelarekin, intxaur muskatuarekin eta piperrarekin prestatua… sekulako nahasketa!

3. Gozatu zuzi-jaitsieraz. Eta zer da hori? Prozesio berezi bat, non zaldizkoak, damak, zaldunak, gurutzatuak, herritarrak eta turistak nahasten diren. Guztiak zuziak eskuan dituztela, prozesio solemne batean jaisten dira Le Pont Levitik Place Carnoteraino.

Larunbata, abenduaren 6a

Porte Narbonnaiseren aurrean Gabonetako eszenatoki txiki hau aurkitzen dugu, pinguino eta guzti. Enekok Madagaskar filmekoak bezalakoak direla pentsatzen du, «politak eta apainak».

Baina berehala emakume zahar honekin egiten dugu topo: Dama Carcas, hiriaren zaindaria.

Dama Carcas.

Kondairak dioenez, Karlomagnok Carcassonne setiatu zuenean, Ballak errege musulmana hil egin zen, eta haren emazteak, Dama Carcasek, hiria gobernatu eta defendatu behar izan zuen, borrokan aktiboki parte hartuz. Bost urteko setioaren ondoren, bakarrik zegoela, lastozko panpinak jarri eta baleztekin geziak jaurti zituen, etsaiari bere armada oraindik indartsua zela sinetsarazteko. Hirian biztanle guztiak elikatzeko txerrikume bakarra eta gari anoa bat besterik geratzen ez baziren ere, harresiaren gainetik bota zituen. Karlomagnok setioa altxatu zuen, herriaren indarraz konbentzituta. Erretiratu zirenean, Dama Carcasek tronpetak jotzeko agindu zuen, «Carcas sonne», Karlomagnori deitu eta bakeak egiteko.

Zortea dugu, abenduaren 6an sarrera doakoa izatea erabaki baitute Château Comtal gazteluan.

Château Comtal gaztelurako sarrera.

Kondearen gaztelua XII. mendean eraiki zuten Trencavel familiakoek, Carcassonneko bizkondeek. Mendeetan zehar aldaketa ugari izan zituen, eta XIII. mendean gotorlekua eraikitzen hasi ziren: dorre biribilak, dorretxoak, sarrera, barbakana, lubanarroa…

Paseatzeko egokitutako lubanarroak.

Gazteluko bisita, batez ere, dorreak zeharkatzen dituen goiko erronda-bide batetik egiten da. Ibilaldi horretan lau puntu interesgarri ikus daitezke:

1.- Harresi bikoitzaren zati bat, bere dorretxoekin eta arbelezko teilatu konikoekin.

2.- Saint-Gimer eliza Viollet-le-Duc arkitektoak diseinatu zuen XIX. mendean, estilo gotikoaren interpretazio oso bereziarekin.

3.- Gazteluko sarrera nagusia, barbakana-dorre erdizirkular batekin. Gotorlekuan sartzea lortzen zuen etsaiak gainditu beharreko lehen oztopoa zen.

4.- Barneko harresiaren zati bat eta IV. mendeko dorre erromatar bat, barbaroen inbasioetatik babesteko eraikiak.

Bisita museo txiki batean amaitzen da. Bertan erlijioarekin lotutako pieza ugari daude: bataiarriak, grabatutako hilarriak, kalbario ikusgarri bat… Guri friso batean irudikatutako buru-bilduma bat gustatu zitzaigun bereziki.

Bazkaltzeko orduan gaztelutik irteten gara, atseden hartzeko eta gaueko orduetarako prestatzeko.

Iluntzen duenean, orain bai, Carcassonneko Gabonetako azoka bisitatzen dugu.

«La Magie de Noël» delakoaz gozatzeko prest gaude. Hori hiriak 2015eko abenduaren 5etik hurrengo urtarrilaren 3ra arte antolatutako jardueren egitaraua baino ez da. Erdi Aroko antzezpenak La Citén egiten baziren, aisialdiko jarduerak La Bastide Saint-Louiseko hiru gunetan biltzen dira:

• Place Gambetta
• Place André Chénier
• Place Carnot.

Place Gambettan, Aude ibaia zeharkatu bezain laster gure aurrean zabaltzen den plaza handian, aurten argiztatutako Olentzero ez, baizik eta Bizarzuri erraldoi bat eta ia beti hutsik dagoen karrusel bat besterik ez dute jarri.

Beraz, Place Carnot plazara hurbiltzea erabakitzen dugu. Bertan izotz-patinajeko pista handi bat dago, eta haren inguruan Gabonetako azoka antolatu dute.

Gabonetako azokako etxolak, jendez lepo.

Lehenengo, patinatzera! Sarrerak hartzeko ilara dago: 5 euro pertsonako eta orduko. Kontuan izan behar da pista 19:00etan ixten dutela.

Patinaje-pista Neptunoren iturri ospetsuaren inguruan dago, eta iturria babestuta dago egun horietarako. Haurtxoek, haurrek edo patinatzaile traketsenek aulkitxo batzuk dituzte, pistan zailtasunik gabe mugitu ahal izateko.

Patinatzeaz aspertzen garenean, pista utzi eta Gabonetako azokako postuen giroaz gozatzera joaten gara: txokolate beroa, Aligot (Aveyron eskualdeko espezialitatea, gaztarekin, esne-gainarekin, gurinarekin eta baratxuriarekin egina), ardo beroaren postuak… Kaloriak berreskuratzeko aukera ugari!

Egun nekagarri hau amaitzeko, Gabonetako azokako azken etxolek, ixteari gogor eusten ziotenek, azkenean ateak ixten dituztenean, La Bastide auzoko kaleetan barrena sartzen gara, Gabonetako argiez eta giroaz pixka bat gehiago gozatzeko.

Igandea, abenduaren 7a

Eguneko argi-orduak berriro aprobetxatzen ditugu Erdi Aroko La Citén beste bisita labur bat egiteko, oraingoan aurreko egunean oharkabean pasa zitzaizkigun monumentu batzuk ezagutzeko. Gu bisitak patxadaz egin behar direla pentsatzen duten horietakoak gara, denaz benetan gozatu nahi bada behintzat. Place Auguste Pierre Pont plazaren zati handi bat hartzen du Saint-Nazaire basilikak.

XI. eta XIV. mendeen artean eraikitako basilika zoragarria da, estilo erromanikoa eta gotikoa oso modu harmoniatsuan uztartzen dituena. Alde batetik, ataria eta zortzi kapitel erromanikoak nabarmentzen dira; bestetik, gargolak eta estilo gotikoko beirateak. Azken horiek eskualdeko ederrenetakoak dira.

Plaza berean gotorlekuaren barruko hotel bakarra ikus dezakegu, eta handik pauso gutxira Erdi Aroko hiriguneko etxerik zaharrena.

Hôtel de La Cité.

Carcassonneko La Citéko etxerik zaharrenaren gaueko ikuspegia.

Kalez kale ibiltzen gara pixka batez, eta abenduko hilabete honetarako ohikoak ez diren tenperatura epelez gozatzen dugu.

Laster putzu txikiaren aurrean gaude, baina garrantzitsuena handia dela dirudi. Kondaira batek dio putzu handiak altxor baliotsu bat gordetzen zuela, nahiz eta 1910eko indusketa arkeologikoetan ez zuten ezer aurkitu. Hiri-kondaira bat izango da, agian…

Bazkaltzeko orduan atseden hartzera joaten gara eta, banpiroak bezala, eguzkia sartzen denean berriro ateratzen gara La Bastiderantz, La Magie de Noël egitarauak proposatzen duen Gabonetako hirugarren gunera joateko: 3.- André Chénier lorategiak.

Hiritik urrunen dagoen eremua da, baina merezi du bertara hurbiltzea, azoka eta atrakzio ugari baitaude. Helduek haurrek bezala gozatzen dute, eta haurrek ez diote une batez gozatzeari uzten. Familian joaten bazarete, primeran pasatuko duzue; ez duzue handik atera nahi izango!

Azokako xehetasun gehiegirekin luzatu nahi ez dugun arren, gozatu genituen atrakzio batzuk aipatuko ditugu:

Sartu bezain laster, Noël tren txikiarekin egiten dugu topo. Tren koloretsu txiki bat da, Gabonetako zuhaitz baten inguruan ibilbide zirkularra egiten duena. Ondoren, pauso batzuk aurrerago, izeia magikoa ikusteak harritu gintuen, bere asmamen eta originaltasunagatik. Gabonetako izei handi bat irudikatzen duen atrakzioa da, eta bolak eserleku bihurtzen dira. Martxan hasten denean, botoi bat sakatuz gora igotzen dira. Txikienentzat aproposa iruditu zitzaigun. Ildo beretik, aurkezpenik behar ez duen beste atrakzio lasai eta goxo bat: karrusel handia. Baina emozio biziak sentitu eta adrenalina pixka bat askatu nahi badugu, txirrista handira igo behar dugu. 16 metroko txirrista da, bi urtetik gorako haurrentzat. Edo, bestela, noria klasikoa aukera dezakegu, handik hiriaren ikuspegirik ikusgarrienak gozatzeko.

Lerro hauen amaierara iritsi bazarete, Carcassonnen giro eta dibertsiorik falta ez dela ikusiko zenuten, ezta Gabonetan ere. Urtero, abenduaren hasieratik urtarrilaren amaierara arte, familia osoak gozatzeko leku bihurtzen da. Ez al zaizue hala iruditzen?

BIDAIAKO INFORMAZIOA
Oraindik denbora baduzue, Carcassonnetik 50 kilometro baino gutxiagora dauden eta axolagabe utziko ez zaituzteten hiru bisita proposatzen dizkizuegu. Interesatzen bazaizkizue, HEMEN aurkituko dituzue.

Guk bezala kanperrez edo autokarabanaz bidaiatzen baduzue, harresien kanpoaldean dagoen autokarabanentzako gunean gera zaitezkete.

AIRE DE SERVICES POUR CAMPING-CARS DE LA CITÉ
Parking de délestage P2 – Cité Médiévale, Chemin de Montlegun, 11000 CARCASSONNE

Koordenatuak:
lat. 43° 12′ 18″ – long. 2° 22′ 25″

Informazio gehiago:
Autokarabanentzako gunea

Turismo-informazioa:
http://www.turismocarcassonne.es/

Deskargatzeko planoa eta turismo-informazioa.