PLATAKO ITSASARGIRAKO BIDEAN
Platako itsasargia leku berezia da, gaztelu batean piztuta dagoen itsasargia. Baina ez, ez dizuet horregatik bakarrik hitz egingo hari buruz. Pasaiako itsasontziei bidea argitzen dien argia da, eta, gainera, ni bertakoa naiz. Etorriko zarete nirekin?
Furgoneta Pasai San Pedroko kaian aparkatzen badugu, itsasargirantz abiatu beharko dugu, malda leunean gora egiten duen bi kilometro inguruko bide laburretik. Txikitan korrika igotzen nintzen, esploratzaile izatera jolasten. Dirudienez, orduan ere nahiko berezia nintzen jolasteko orduan… Eta jolastu egiten nuen, eta benetan sinesten nuen esploratzailea nintzela. Izan ere, kostaldeko Donejakue Bidearen parte den bide honetatik era guztietako pertsonak igarotzen ziren, hemengoak eta hangoak, eta agurtu egiten ninduten.
Laster begiratoki eder batera iristen gara, eta handik portu natural baten sarrera ikusgarria ikusten dugu: Pasaiako portua.
Eta hor dago askotan ahaztuta geratzen den herri ederra: Pasaia Donibane.
Oraindik ere turista askok, Easo Ederraren distirak liluratuta, bisita hau alde batera uzten dute. Itsas herri bat da, kresal usaina darion horietakoa, non etxeek flotatzen dutela dirudien, lurraren eta itsasoaren arteko benetako hesia osatuz. Baleazaleen etxeak dira, baita Victor Hugo bezalako pertsona ospetsuen bizileku izandakoak ere. Han arraunek agintzen dute, eta herriko traineru-taldearen kolore arrosa leiho guztietan ageri da. Eta jatetxeak? Guretzat ohikoa bihurtu den zerbait harrigarria: arrantza-sareak itsasotik beren sukaldeetaraino iristen direla dirudi.
Ez al zaizue gose pixka bat sartu? Bada, bideari jarraituz, metro batzuk aurrerago, itsasora begira dagoen terraza eder bat aurkituko dugu. Mahai horietan gelditzen ginen hamaiketakoa egitera eskolako txangoetan, bakoitza bere motxila, txapela eta ibiltzeko zapatilekin.
Gora jarraitzen dugu, eta dagoeneko itsasargia ikusten da. Gaztelu bat dirudi, leku sorgindu bat. Bere begiratoki handira hurbiltzen gara, eta Jaizkibel mendiko labarrek keinu bat egiten digute.
Bitartean, haitza betetzen duen antxeta-kolonia handiaren karranka ozen eta hutsak ditugu lagun. «Kanpora! Kanpora!» oihukatzen digutela dirudi. Ingelesaren Iturrira eramaten gaituen bidezidor estutik jarrai genezake, erromesek edan ohi duten «ur miragarria» dagoen lekura. Eta bideari jarraituz, betiere kostaldetik, Donostiara iritsiko ginateke. Baina hori beste ibilbide bat da. Itzuliko gara?
BIDAIAKO INFORMAZIOA:
Autokarabanaz gaua pasatzeko gertuen dagoen gunea:
http://www.areasac.es/areas/gipuzkoa/errenteria_1987_1_ap.html
http://www.naiz.eus/es/especiales/bizigogoz/noticia/20130515/faro-de-la-plata
