LE BARCARÈS GABONETAN: LE VILLAGE DE NOËL HAURREKIN
Abenduro asko gustatzen zaigu Frantziako hegoaldeko Gabonetako azoketara kanper furgonetaz bidaiatzea, eta urtero Gabonetako azoka desberdin bat bisitatzen dugu. Gauza zoragarriak entzunak genituen Le Barcarès Gabonetan eta bertako Le Village de Noël azokari buruz. Gabonak familian bizitzeko sortutako lekua da. Haurrentzako jolasez eta dibertsioz betetako mundu magikoa, non Gabonetako giroa txoko guztietan sumatzen den.
Hainbesteko jakin-mina genuenez, abenduaren hasieran libre genituen lehen egunetan kanper furgoneta martxan jarri eta Le Barcarèseko Le Village de Noël azoka ezagutzera abiatu ginen.
⭐NON DAGO LE BARCARÈS?
Le Barcarès Frantziako hego-ekialdeko kostaldean dagoen herria da, Ekialdeko Pirinioetako eskualdean. Udan turistez gainezka egoten da; neguan, berriz, apartamentu hutsez betetako herri fantasma bihurtzen da. Seguruenik, bestela ez ginatekeen bertara hurbilduko. Hala ere, gizakiaren irudimenak dena berrasmatzen du, eta abendua iristean Le Barcarès Gabonetako hiri ikusgarri bihurtzen da. Goazen Le Barcarèseko Le Village de Noël azokaz gozatzera!
⭐NOIZ BISITATU LE BARCARÈSEKO LE VILLAGE DE NOËL? Datak eta egitaraua
Gure esperientziaren arabera, abenduko zubia da Frantziako hegoaldeko Gabonetako azoketara bidaiatzeko garairik onena. Aste horretan, Gabonetako azokak bete-betean daude martxan, eta ekitaldi ugari antolatzen dira. Hala ere, ez duzue jendetza handirik aurkituko, Frantzian egun horiek ez baitira jaiegunak.
Hauek dira 2023ko datak eta informazioa.
Marché de Noël Le Barcarès ➡️ Azaroaren 25etik urtarrilaren 7ra.
⭐ZER IKUSI ETA EGIN LE BARCARÈSEKO LE VILLAGE DE NOËL AZOKAN
Le Barcarèsekoa Frantziako hegoaldeko Gabonetako azokarik handiena da. 3.000 metro koadro baino gehiagoko eremua dugu zain Le Barcarèseko Le Village de Noël azokaren barruan, Gabonak haurrak bagina bezala bizitzeko.
⚠️ Hala ere, ohartarazi behar dizuegu Frantziako herri txikien xarma bilatzen baduzue, bertako biztanleek Gabonetarako mimo handiz apaindutako kaleak eta produktu tipikoak lasai erosi eta dastatzeko giroa, hau ez dela leku egokia.
Abenduro, Le Barcarèsek erabat eraldatzen du herriaren erdigunea, Gabonetako hiri handi bat antolatzeko: Le Village de Noël. Gabonetako azoka, atrakzio-parkea eta parke tematikoa uztartzen dituen lekua da. Le Barcarèsek izugarrizko indarra ematen dio Gabonetako ospakizunari.
Zer aurkitu genuen Le Barcarèseko Le Village de Noël azoka bisitatzean?
Aisialdirako gune handi bat aurkitu genuen, leran jaisteko txirrista batekin eta izotz-patinajeko pista handi batekin. Pistan pantaila erraldoi bat zegoen, musika-bideoak proiektatzeko. Gainera, noizean behin hartzak edo pinguinoak bezalako pertsonaiak agertzen ziren ezustean, eta jendearen artean patinatzera ateratzen ziren, giroa alaituz.
Patinak alokatzea ez da merkea, baina gure semeari patinatzea izugarri gustatzen zaionez, horixe izan zen arreta eman zion lehenengo gauza. Eta hantxe ibili ginen gu ere, patinatzen lehen urratsak egiten.
Patinaje-saioaren ondoren, elur artifizialez erabat estalita eta argiz egindako Disneyko animalia eta pertsonaien irudiekin apainduta zegoen lorategi harrigarri bat zeharkatu genuen. Irudiak pertsona baten tamainakoak ziren… Haurrak, gurea barne, txoko guztietan gelditzen ziren Plutorekin, Minnierekin eta beste pertsonaiekin argazkiak ateratzeko. Zur eta lur geratu ginen!
Indarrak berreskuratu behar genituen; beraz, helduentzako Gabonetako azokaz gozatzera joan ginen. Taberna moduko batean gelditu ginen ardo gozo bat eta saltxitxoi pixka bat hartzeko. Gabonetako azoka guztietan bezala, etxoletan denetarik aurki zitekeen: produktu tipikoak, haurrentzako jostailuak… Eta horietakoren bat ere erosi genuen 🙂
Karpa handi
